BANKUEN
BERRANTOLAKETA
Kutxabanken sorrera, BBK, Kutxa eta Vital integratzearen emaitza, Iparkutxa Laboral Kutxan integratzearekin batera, mugarri bat da euskal finantza-sistemaren berrantolaketan. Prozesu horri esker, eredu sendoagoa, eraginkorragoa eta lehiakorragoa finkatu ahal izan zen, enpresa-sarearen finantzaketa-ahalmena indartuz eta lurralde-errotze handiko finantza-eredua bermatuz. Halaber, Euskadin erabakiguneak babesten eta lurraldearen garapen ekonomiko, sozial eta kooperatiboarekiko konpromisoari eusten lagundu zuen.
BANKU
FUNDAZIOAK
Kutxen jabetza-ereduaren transformazioaren ondorioz, banku-fundazioak sortu ziren, gizarte-ekintza zaintzeko eta lurraldearen finantza-egonkortasuna bermatzeko. Euskal fundazio horiek funtsezko zeregina hartu dute garapen sozioekonomikoan eragile garrantzitsu gisa, baliabide garrantzitsuak kudeatuz eta hainbat esparrutara bideratuz, hala nola gizarteratzera, kulturara, hezkuntzara eta enpresa-sareari laguntzera.
FINKATUZ
FUNTSA
Finantzen Euskal Institutuak (FEI) Finkatuz funtsa bultzatzen du, Euskadin funtsezko enpresen errotzea indartzeko tresna estrategiko gisa. Partaidetzak hartzearen bidez, erabaki-zentroak babestea, deslokalizazioak saihestea eta lurraldeko enpresa-sarea eta enplegua babestea bilatzen du. Ekimen hau beste mekanismo batzuekin osatzen da, hala nola Indartuz, finantzaketa erraztera eta enpresa-garapena laguntzera bideratuak, FEIk lurraldeko politika ekonomikoan funtsezko eragile gisa duen papera indartuz.
BASQUEFIK
ETA ALIANTZA
BASQUEFIK Klusterra Euskadiko finantza- eta inbertsio-ekosistema osoa artikulatzeko, konektatzeko eta irudikatzeko gune gisa sortu da, eta finantza-, inbertsio- eta aseguru-esparruko funtsezko erakundeak integratuz. Lurraldearen garapen ekonomikoan eragile aktibo gisa sektoreak duen zeregina indartzeko, estrategiak lerrokatzeko eta gaitasunak koordinatzeko beharrari erantzuten dio. Era berean, Euskal Finantza Aliantza bultzatzen da, 4.000 milioi euro baino gehiago mobilizatuz Euskadiren eraldaketa ekonomiko eta jasangarria bultzatzeko, lankidetza publiko-pribatua indartuz eta enpresa-sareari lagunduz.
